«Тоттенхэм» ҳужумчиси Харри Кейн «Манчестер Сити»га қарши Англия Лига кубоги финалини ўтказиб юбориши мумкин.

Лондон клубининг вақтинчалик бош мураббийи Раян Мейсоннинг айтишича, клуб ҳужумчининг соғлиғига хавф туғдирмоқчи эмас.

Унинг жароҳатдан тикланиши мажбурий бўлмайди ва агар у 100% тайёр бўлмаса, учрашувда иштирок этмайди.

«Кейн ҳақиқий профессионал. Биз унинг аҳволини кузатамиз, у ўзини қандай ҳис этаётганини назорат қиламиз. Харри ўзини тайёр деб ҳисобламаса, биз унинг соғлиғига хавф солишимиз керак эмас. Аниқки, биз бундай қилмаймиз»,-дейди мутахассис.

Маълумот ўрнида, жорий мавсум 27 ёшли инглиз футболчиси «шпорлар» билан барча турнирларда 43 учрашувда майдонга тушиб, 31 гол ва 16 голли узатмани ўз ҳисобига ёздириб қўйган.

Эслатиб ўтамиз, Англия Лига кубоги финали 25 апрель, якшанба куни бўлиб ўтади.