Эркин кураш бўйича Осиё чемпиони Бекзод Абдураҳмонов UFC’га ўтиши мумкин. Бу ҳақда «Оламспорт» хабар қилмоқда.

Ўзбекистонлик спортчи UFC промоушенидан таклиф бўлгани ва Олимпиададан кейин музокараларни давом эттиришини айтди.

"UFC’дан таклиф бор. Бироқ ҳозирда бор эътиборимни эркин курашга, Олимпиада ўйинларига қаратганман. UFC’дагилар билан гаплашдик, улар билан музокараларни Токио—2020 Олимпиадасидан кейин давом эттириш борасида келишиб олдик.

UFC’да бир яккакурашчи битта жанг учун ўртача 24 минг доллар гонорар олади. Агар жангчи Олимпия ўйинлари чемпиони ёки совриндори бўлса, у ҳолда яхшироқ шартларни қўйиши мумкин. Бу орқали жангдан тушадиган гонорар ҳам ошиши мумкин. Айнан шу сабаб бор эътиборимни Олимпиадага қаратганман", — деди Бекзод Абдураҳмонов.

Бекзод Абдураҳмонов — 1990 йил, 15 март куни Тошкент шаҳрида туғилган. У эркин кураш бўйича икки карра Осиё ўйинлари ғолиби (2014, 2018 йил), икки карра Осиё чемпиони (2015, 2017) ва икки карра Жаҳон чемпионати бронза медали соҳиби (2014, 2018) ҳисобланади. Шунингдек, спортчи Рио—2016 Олимпия ўйинларида 4-ўринни эгаллаган. Бекзод 2021 йилнинг ёзида бўлиб ўтадиган Токио—2020 ёзги Олимпия ўйинларида иштирок этади.

Маълумот учун, UFC промоушенида айни дамда уч нафар ўзбекистонлик яккакурашчи фаолият юритмоқда. Улар: Маҳмуд Муродов, Зарруҳ Адашев ва Лилия Шокирова.