"Боруссия Дортмунд" ҳужумчиси Эрлинг Ҳоланднинг агенти Мино Райола мижозига бўлган қизиқиш ҳақида гапирди.
"Мен Дортмунд вакиллари билан гаплашдим, улар Эрлингни сотмоқчи эмасликларини аниқ айтишди. "Биз уни сотмаймиз" - бу уларнинг аниқ гаплари".
"Реал" каби клублар Ҳоланднинг трансферини амалга оширишга қодир. Уни сотиб олиш учун уларнинг маблағлари етарли. "Барселона" учун бу қийинроқ, аммо Каталонияга ўтиш эҳтимолини истисно қилмаслик керак. Умуман олганда, Эрлинг Ҳоланднинг трансферига ҳозирда Европанинг 14 клуби қизиқиш билдирмоқда. Энг яхши вариантни танлаш керак", - деди Райола.
20 ёшли Эрлинг Ҳоланднинг трансфер қиймати 110 миллион еврони ташкил қилмоқда. Ушбу мавсумда норвегиялик ҳайратланарли кўрсаткичлари билан ўйин кўрсатишда давом этмоқда ва аллақачон 37та гол урди. Умуман олганда Дортмундликлар сафида 56 учрашувда 53та гол урди ва 14та голли узатмани амалга оширди.
Эслатиб ўтамиз, Ҳоланд 2020-йил қишида Австриянинг "Залцбург" жамоасидан 20 миллион евро эвазига "Боруссия Д"га кўчиб ўтганди. Миш-мишларга кўра, Дортмунд ўз ҳужумчисини камида 150 миллион еврога сотмоқчи.