«Ювентус» ҳужумчиси Криштиану Роналду профессионал фаолиятини «Спортинг»да якунлаш ҳақида ўйламоқда.

Sport Mediaset журналисти Клаудио Раймонди хабарига кўра, 36 ёшли португалиялик «Ювентус» билан янги шартнома имзолаш ниятида эмас ва у 2022 йил ёзида, унинг туринликлар билан амалдаги шартномаси тугагач, «Спортинг»га ўтмоқчи.

«Роналду аллақачон келажак учун режаларини шакллантирган. У «Ювентус»даги юришини якунламоқчи ва икки йилни «Спортинг»да ўтказмоқчи.

Аммо, Криштиану айнана ҳозир Турин клубини тарк этмоқчи эмас. У 2022 йилда тугайдиган шартномасини ҳурмат қилади. Ўз навбатида, унинг Испания, «Реал»га қайтиш имкониятлари жуда паст даражада. Шунингдек, «Манчестер Юнайтед» ҳам Роналдуни сотиб олиш учун молиявий имкониятга эга эмас.

Ҳеч қандай ҳолатда у ҳозир «Ювентус»ни тарк этмайди. Бунга эса унинг шахсий сабаблари ва айниқса ҳомийлар билан алоқалари йўл қўймайди», - деди Раймонди.

Роналду 2018 йилдан бери «Ювентус»да ўйнаб келмоқда. Ҳужумчи 1997 йилдан 2003 йилгача бўлган вақт оралиғида эса «Спортинг» сафида тўп тепган.

Маълумот ўрнида, Португалиялик юлдуз ушбу мавсум, А Сериянинг 30 ўйинида майдонга тушиб, 27 гол ва 3 голли узатма амалга оширди.