“Dubai Matchworld Cup 2012” турнирининг учинчи ўрин учун кечган баҳси якунланиши биланоқ журналистлар Миржалол Қосимовнинг фикрлари билан қизиқишди.

— Табрик учун раҳмат! Ҳар қандай турнир бўлишидан қатъи назар футболчиларда ғалаба қозониш истаги кучли бўлади. Бугун ғалаба қозонишдан ташқари, энг асосийси — янги мавсумга муносиб тайёргарлик кўришни ва расмий мусобақаларда муваффақиятли иштирок этишни ният қилгандик. Учрашувларимиз бўлмаган кунларда икки маҳалдан машғулот олиб бордик.

"Шахтёр" — ўз сафида маҳоратли футболчиларни жамлаган кучли рақиб. Бундай жамоаларга қарши учрашувларда мураббийлар ўз шоигрдларининг қандай тайёргарлик олиб бораётганинин таҳлил қилиб олишлари мумкин. Учрашув давомида бир неча бор хавфли вазиятлар содир этдик — бу албатта қувонарли.

Шунингдек, кейинги машғулотларимизда бартараф этишимиз лозим бўлган камчиликларимиз ҳам йўқ эмас. Голни кутилмаган вазиятда ўтказиб юбордик. Пенальтилар сериясида нуқтага яқинлашувчи футболчиларни ажратиб чиқиб, ҳал қилувчи зарбани Нестеров йўллашини айтгандим. Воқелар ривожи сал бошқачароқ бўлди: аввал Игнат гол уриб, кейин рақибга гол уриш учун имкон бермади.

Ушбу муваффақият билан мухлисларимизни муборакбод этмоқчиман. Бироқ шуни қўшимча қилмоқчи эдимки, ҳалқаро миқёсдаги жамоага айланишимиз учун ҳали қиладиган ишларимиз кўп, - деди Миржалол Қосимов.