Бугун Зинедин Зидан "Реал Мадрид"ни тарк этганини эълон қилди. Шундай қилиб, франциялик мураббий иккинчи бор ўз хоҳишига кўра "қироллик клуби"ни тарк этмоқда. Бунга сабаб нимада?Майдароқ сабаблар кўрсатишимиз мумкин, аммо барибир катта сабаб бу мураббийнинг ўз мавқеини сақлаш учун айрим нарсаларни қурбон қила олишидир.

"Реал"ни кетма-кет уч маротаба Чемпионлар Лигасида чемпион қила олган Зидан бундан 3 мавсум аввал Мадрид клубини кичик тортишув сабаб тарк этган эди. Уна кераксиз, футболчини раҳбарият қадрлаши ва хатто мураббийдан ҳам баланд даражага қўйиши унга ёқмаган эди. Гап ким ҳақида кетаётганини тушунмаган бўлсангиз керак. Ҳозир у футболчи "Тоттенхэм"да ўйнамоқда ва яна "қаймоқранглилар" сафига қайтиш ниятида. Бу қайси футболчилиги ўта сирли бўлиб кетди. Хуллас, Зидан клубга ўз талабларини қўя олади. Агар, клуб унинг талабларини кўтара олмаса у хоҳлаган пайти у ўз лавозимини тарк этишга тайёр. Аслида, ўша пайти Зидан Перес билан келиша олмади, аммо барибир у қайтди ёки қайтаришди десак ҳам бўлаверади.

Бу сафар унинг кетишига нима сабаб бўлди?

Бу мавсум "Реал" ЕЧЛ ярим финалгача борди ва унда "Челси"га мағлуб бўлди. Ла Лигада ҳам клуб охиригача курашди, аммо барибир якунда Мадриднинг бошқа бир клуби "Атлетико" чемпионликни қўлга киритди. Мавсум муваффақиятсиз якунланди, аммо раҳбарият томонидан Зиданга ҳеч қандай эътирозлар бўлмаётган эди. У қила оладиган ишни бошқа бир мураббий бу клубда қилиши қийин. Унинг кетишига, биргина изоҳ берса бўлади. У шунчаки зерикди. Бу клубда ишлашдан ва қайсар раҳбарият билан ҳамкорлик қилишдан зерикди. Янги чақирувлар даври келганини тушуниб етди. Ўз вақтида у "Реал"ни тарк этиб, яна қайтган пайти ўзи тузган "голлактикос"нинг каттароқ қисми сақланиб қолган эди. Айни пайтга келиб ўша пайтдаги футболчиларнинг кўпчилиги ўз фаолиятида пасайишни бошдан кечирмоқда. Катта трансферлар ҳам фақат гапда қолиб кетмоқда. Бироз образларда айтадиган бўлсам, Зидан тайёр маҳсулотлардан яхши таом тайёрлай олади, аммо маҳсулотни ўзи етиштира олмайди. Ҳозир "Реал"ни бошидан қуриш керак. Балки, Зидан буни ҳам уддалай олган бўлар эди. Шунчаки, унинг бунга сабри етмагандир, балки.

Унинг ўрнига ким келади?

Унинг ўрнига "Реал"да Аллегрини кўришимиз мумкин, аммо у айни дам "Ювентус" билан музокараларни бошлаб юборган. Конте эса энг муқобил вариант. У айни дамда ишсиз. Унинг даражаси "Реал"га мос тушади ва у клубга натижалар келтира олади. Фақат бир муаммо шуки, у ҳам жамоа қуриш масаласида мақтана олмайди. У ҳам тезроқ натижа кўрсатишни хоҳлайдиган мураббий. Рауль варианти эса энг сўнггиси ҳисобланади. Тобора шу вариантга яқинлашиб бораётгандаймиз.

Унинг ўзи қайси клубни бошқариши ҳозирча номаълум. "Ювентус" деб айтар эдим, аммо Турин клуб айни дам собиқ мураббийни қайтариш билан овора. Франция терма жамоасида эса Зиданнинг ишлаш эҳтимоли паст. Сабаби, клубда тез-тез ўйинлар ўтказиб, катта футболдан кўпроқ баҳраманд бўлиб юрган мураббийлар, терма жамоаларда ишлашни унча ҳушламайди. У АПЛга бориши мумкин, аммо кимга эканлигини айтиш қийин ёки ПСЖ варианти ҳам яхши. Айни дам Почеттинонинг ҳам келажаги сўроқ остида. Ҳаммаси унинг ўзига боғлиқ. У ишлашни хоҳласа ҳар қандай қатта клубларда иш топилади. 

                                                                                              Худайқулов КАРИМ тайёрлади