Арсен Венгер ўзининг бешинчи кубогини ютиш учун яна бир қадам ташлади. Гарчи ўйиннинг биринчи бўлимидан сўнг бунга ишониш жуда қийин эди.
«Арсенал» ўйинни ҳужумкорлик билан бошлаган бўлса-да, 32-дақиқада дарвозасидан тўп олиб чиқишига тўғри келди. Ричард Данн «Астон Вилла»нинг илк голига муаллифлик қилди. Биринчи бўлимнинг сўнги дақиқаларида «канонирлар» яна бир бора гол ўтказиб юборишганидан сўнг, гўёки ўйинда сенсация юз бериб улгурган, ўйиндаги интрига йўқолгандек туюлган эди. Бироқ...
Иккинчи таймда воқеалар ривожи буткул бошқача кўриниш олди. Ўша йўқолгандек туюлган интрига қайта тикланиши учун 10 дақиқадан ҳам камроқ вақт талаб этилди, холос. Энг қизиғи, ҳисобни қисқартириш, тенглаштириш ва олдинга чиқиб олиш босқичлари Венгер шогирдлари томонидан қандайдир 8 дақиқа ичида амалга оширилди. Бундай кескин бурилишни ҳатто «Арсенал» футболчиларининг ўзлари ҳам кутмаган бўлса не ажаб?
Базан шунақа бўлади. Омад бутунлай юз ўгиргандек бўлиб турганида, тўсаттан ҳаммаси сенинг фойдангга ишлай бошлайди. Қисқагина вақт оралиғида рақиб дарвозаси томон икки бора пенальти белгиланиши, Уолкоттнинг тасодифий голи кўринишларида лондонликлар учун иккинчи бўлимда ҳаракат қилган омад, ғалабанинг асосий омилларидан бири бўлганини тан олиш лозим.
Англия кубоги. IV босқич
АРСЕНАЛ - АСТОН ВИЛЛА 3:2 (0:2)
Голлар: ван Перси (54-пенальтидан, 61-пенальтидан), Уолкотт (56) — Р. Данн (32), Бент (45)
