Про лига 2-даврасининг дастлабки ўйини – 10-тур доирасидаги «Янгиер» - «Динамо» (1:2) учрашувидан кейин дастлаб Самарқанд жамоаси устози Ҳаким Фузайлов ғалабали ўйин борасидаги фикрларини билдирди.

«Ўйин ҳақида нима дейишим мумкин? Олдин ҳам айтгандим, Про лигада кучсиз клубнинг ўзи йўқ. Барча жамоалар деярли тенгкучли бўлиб, ҳар ўйинда ғалаба учун интилишмоқда, ҳар бир баҳсга жиддий тайёрланишмоқда.

«Олимпик» билан Тошкентдаги ўйиндан кейин тайёргарлик учун вақтимиз оз эди. Қийин ўйинга қарамай, жамоамиз яхши ўйин намойиш этиб ғалаба қозонди. Бугун биз каби рақиб ҳам ғалабани илиб кетиши мумкин эди. Бу борада омад бизга кулиб боқди ва муҳим очколарни қўлга киритдик.

Ғалабанинг асосий омили? Энг аввало футболчиларнинг ўз кучини тўлиқ ишга солиб, ғалабага бўлган иштиёқи бизга ғалаба келтирди. Аммо ўйин бўйича жамоамизда чарчоқ аломатлари сезилди, бундай иссиқ ҳаво шароитида футболчилар тезроқ чарчаб қолишади.

- Охирги икки сафар ўйини – олдинги тур «Олимпик» (1:2) ва бугун «Янгиер» (1:2) билан баҳсда жамоангиз биринчи гол ўтказиб юбормоқда, кейин эса иродали ғалабага эришаяпти. Бу нима билан боғлиқ?
- Йигитлар характер кўрсатишмоқда. Ўйинга тушаётган ҳар бир футболчи борки, майдонда борини бераяпти. Айнан шу курашувчанлик бизга ғалаба келтирмоқда.

«Янгиер»? Уларга қарши биринчи даврадаги ўйинимиз ҳам, бугунгиси ҳам тенгкурашлар остида кечди, бу жамоада яхши ўйин шаклланган.  

Мақсад? Олдимиздаги вазифа Суперлигага чиқиш. Аммо фақат биз эмас, Про лиганинг камида 5-6та клуби Суперлига йўлланмасига эга чиқмоқчи. Шу боис ёзда таркибимизни кучайтиришимиз лозим, - дейди «Динамо» бош мураббийи Ҳаким Қаюмович.