Бирлашган Араб Амирликларидаги икки ҳафталик ўқув йиғин машғулотларини ўтказиб қайтган “Насаф” футболчилари қисқа танаффусдан кейин 29 январдан бошлаб машғулотларни Тошкентда бошлаб юборишганди.
Тўрт кун мобайнида Рўзиқул Бердиев шогирдлари кунига икки маҳал – эрталаб минифутбол залида, кечки машғулот стадионда ўтказиб келишди. Бугун жамоамиз аъзолари Тошкентдаги сўнгги машғулотни пойтахтимиздаги “NBU-Osiyo” стадионида ўтказишди. Эртага, 2 февраль куни мамлакат вице-чемпиони хориждаги иккинчи ўқув-йиғин машғулотларини ўтказиш учун Туркиянинг Анталия шаҳрига жўнаб кетади.
Жамоа таркибидаги ўзгаришларга тўхталадиган бўлсак, янги йилнинг дастлабки ойида таркибга учта янги футболчилари келиб қўшилди. Дарвозабон Ғайрат Ҳасанов, ҳимоячи Шавкат Раимқулов ҳамда ярим ҳимоячи Суҳроб Неъматов “Насаф” билан шартнома тузишди ва янги мавсумни жамоамиз таркибида бошлашади.
