Кечанинг муҳим воқелиги сабабчиси бўлган Кристиан Эриксен Дания - Финляндия учрашувининг энг яхши ўйинчиси деб топилди. Бу ҳақда УЕФА матбуот хизмати хабар бермоқда.
Эслатиб ўтамиз, Скандинавия терма жамоалари ўртасидаги «B» гуруҳидаги 1-тур ўйинининг биринчи ярми охирида Эриксен ҳушини йўқотди ва майсазорда йиқилиб тушди.
Майдонда шифокорлар унга тиббий ёрдам кўрсатдилар, шу жумладан тўғридан-тўғри юрак массажи амалга оширилди. Кейин Кристиан Копенгагендаги касалхонага ётқизилди. Кейинчалик футболчи ўзига келгани ва унинг ҳолати барқарорлашгани маълум бўлди.
Дания - Финляндия ўйини деярли икки соатлик танаффусдан сўнг тикланди. Учрашув 1:0 ҳисоби билан Финляндия жамоаси фойдасига якунланди.
