Coca Cola Суперлига 11-туридан ўрин олган “Металлург” – “Навбаҳор” (2:2) учрашувидан кейин ўтказилган матбуот анжуманининг дастлабки қисмида “лочинлар” бош мураббийи Виктор Жалилов ўйин ҳақидаги фикрларини билдириб ўтди.

— Бугун ўйин темпи яхши бўлди, натижа ҳам адолатли. Биз ҳам ғалабага яқин келдик, “Металлург” ҳам ўз имкониятларидан фойдалана олмади. Умуман олганда эса, биз устунликка эришдик, кўплаб ҳужумлар уюштирдик.

— Жамоа 0:2га ютқазаётганди, ниманинг эвазига ҳисобни тенглаштирди?
— Менимча, биринчи навбатда, бу жамоада характер, ирода ва куч борлигидан далолатдир. Аввалги матбуот анжуманларида футболчиларнинг жисмоний томонлама тайёр эмасликлари ҳақида гап бўлганди. Агар йигитлар тайёр бўлишмаганда, 0:2 ҳисобини тенглаштира олишмасди. Шунингдек, алоҳида футболчиларнинг маҳоратини эътироф этиш лозим. Албатта, таркибимизда шунақа ҳужумларни бошлайдиган, давом эттирадиган ва самарали якунлай оладиган ўйинчилар кўп бўлишини хоҳлайман. Муҳими, футболчиларимиз вазият мураккаблашганига қарамай, ўйиннинг боришини ўзгартириб, голлар уришни уддалашди.

— “Навбаҳор” бугунги кучли рақиб майдонида қайд этилган дурангдан қониқдими?
— Сўнгги 20-25 дақиқанинг боришидан келиб чиқсак, бугунги натижадан қониқмадим. Голлар урганимиздан кейин ҳам ташаббусга эришдик, яна имкониятлар вужудга келди, аммо улардан фойдалана олмадик. Албатта, ғалаба қозонишимиз ҳам мумкин эди, шу боис, дурангдан кўнглим тўлмади. Умуман олганда, сафарда дуранг ўйнаб, уйдаги барча ўйинларда ғалаба қозониш эвазига чемпион бўлиш ҳам мумкин.

— “Навбаҳор” аввалги 10 та ўйинда 9 та гол урди. Бу кам эмасми?
— Мен учун кўпроқ ҳужум уюштиришимиз муҳим. Янада кўпроқ голлар уришимиз мумкин эди, лекин ҳужум чизиғида муаммомиз бор. Буни мутахассис бўлмаганлар ҳам пайқашлари мумкин. Аммо ишлашда давом этамиз. Мана, сўнгги 3 та ўйинда 6 та гол урдик. Албатта, ҳолатни яхшилашга астойдил уриняпмиз, лекин бошқа жамоалар ҳам бир жойда тўхтаб қолмаяпти.

— Кейинги турда жамоангиз водий дербисида “Андижон”га қарши ўйнайди. Мазкур ўйин ҳақида нима дея оласиз?
— У дерби бўладими ёки оддий ўйинми, барча ўйинлар кескин курашлар остида кечмоқда. Кечаги ўйинларда ҳам кўрдик, жамоаларнинг турнир жадвалида эгаллаб турган ўрни қандай бўлишига қарамай, учрашувлар муросасиз тарзда ўтди. Бизнинг бугунги ўйинимиз ҳақида ҳам шундай дейиш мумкин. Ўйинлар шундай темпда ўтадиган бўлса, бу футболимиз ривожига хизмат қилади. Истагим – майдонда сифатли ҳаракатларни амалга оширадиган футболчилар кўпайсин.

“Навбаҳор” ПФК матбуот хизмати.