Ўзбекистон Суперлигаси директори вазифасини бажарувчи Диёр Имомхўжаев Ўзбекистон чемпионатининг кейинги тақвими, ҳамда "Насаф"нинг ОФК кубогидаги кейинги ўйинлари ҳақида ўз телеграм каналида маълумот берди. Имомхўжаевнинг маълум қилишича, "Насаф" эндиликда ОФК кубоги плей-офф босқичида иккита эмас, балки битта ўйин ўтказади. Қолаверса, ушбу баҳслар Қаршида ўтиши эҳтимоли ҳам бор.
"Августдан ойидан бошлаб декабрга қадар бўлган учрашувлар тақвимини аниқлашда икки масала ҳалал бераётгани ҳақида ёзгандик:
▪️сентябрь, октябрь, ноябрь ойларидаги ФИФА кунлари учун Ўзбекистон МТЖ режаси аниқ эмасди;
▪️Насаф клубининг ОФК кубогидаги кейинги ўйинлари режаси тўлиқ аниқ эмасди.
Шунга қарамай, биз ФИФА кунларидан келиб чиқиб, тақвим туздик. Суперлигадан келиб чиқиб, Про лига саналарини аниқлаб олдик. Аммо ўртада ОФК Насафга боғлиқ мусобақада яна ўзгаришга қўл урди. Эндиликда ОФК кубогининг плей-офф ўйинлари икки эмас, бир учрашувдан иборат бўлади.
Биз Насаф иккитадан учрашувда иштирок этишини инобатга олгандик, энди сентябрнинг 20-санасидан кейинги тақвим учун бироз ўзгариш киритишга мажбурмиз. 25 август куни эса Насаф Туркманистоннинг Аҳал клубига қарши ўйнайди. Учрашувнинг қаерда ўтиши 7 июль кунги қуръа орқали аниқ бўлади. Биз Туркманистондаги пандемик ҳолат ва албатта ўйиннинг Қаршида ўтиши эҳтимолидан келиб чиқиб иш кўрдик. Про лига 16-турини ҳам шундай вақтга қўйганмизки, Футбол-ТВ Насафнинг Қаршидаги ўйинини трансляция қилишига тўғри келса, КТС Ғузордан Қаршига етиб келиши инобатга олинган. Умид қиламизки, Насаф муваффақиятли юришини энди ўзимизнинг мухлислар кўз ўнгида давом эттириш имкониятига эга бўлади", - дейди Диёр Имомхўжаев ўз телеграм каналида.
