Гарет Саутгейт шогирдлари Англияни тарихда илк бор Европа чемпионати финалига олиб чиқишди. Ўйин шиддатли ўтган бўлса ҳам унда жамоалар оддийроқ усуллардан фойдаланишди, аммо хавфли вазиятлар биринчи ярим финалдан кам бўлмади. Биринчи бўлиб айнан Дания ҳисобни очгани ўйиннинг сценарийсини янада қизиқарли тус олишига сабаб бўлди. Агар инглизлар биринчи бўлиб гол урганда бу ёғига прагматик ўйин гувоҳига айланар эдик катта эҳтимол.

Стерлингнинг пенальтисига келадиган бўлсак, пеналти белгилаш учун ҳакамда асос бор эди, чамамда. Раҳим ҳакамларнинг пенальти белгилаши ҳақидаги қарорларни ёддан биладиган футболчи ва у йиқилишдан олдин рақиб билан контактга борди. Секинлаштирилган кадрда вазият жиддий эмасдек кўриниши мумкин. Аммо реал ҳолатда бу контакт йиқилиш учун етарли бўлди. Кейннинг зарбасидан сўнг Каспернинг сейви у пенальтилар сериясига қанчалик тайёрлигини ҳам кўрсатиб турганди. Аммо пенальтилар сериясигача етиб бора олмадик. Англия пенальти эвазига ютган бўлса ҳам, баҳсда рақибидан кучлироқ бўлганини тан олиш керак.

Аммо мана бундай пенальти эвазига финалга чиқиш ҳатто англияликларни ҳам қаноатлантирмагани аниқ. Финалда бундай вазият туфайли ғолиб номига ойдинлик киритилмайди деб умид қиламиз.

11-июль куни "Уэмбли"да Англия - Италия баҳсида Европа чемпионини аниқлаймиз.

Ҳасан Турдиалиев