Испаниянинг "El Confidencial" нашри «Реал Мадрид» президенти Флорентино Переснинг овози ёзилган шов-шувли материаллар чиқарди. Унда клуб афсоналари кескин танқид қилинган ва хақоратланган. Баъзи бирларини келтириб ўтаман:

— Роналду тентак. У ахмоқ, соғ эмас.

— Моуриньо ва Роналду эгоистлар. Бу бузилган одамлар. Ҳақиқатни кўра олишмайди. Агар ўзини тўғри тутганда янада кўп ишлаб топишарди.

— Касильяс ва Рауль «Реал» тарихидаги икки энг катта муғомбирлар. Касильяснинг ақли йўқ. Аёлининг олдида ўзини йўқотиб, ёш болага айланиб қолади. Уни ҳамма яхши кўради. Лекин, у «Реал» дарвозабонлигига мос эмас. У «Реал»нинг омадсизлиги. Яна битта шунақаси бу Рауль.

— Дель Боске умуман мураббиймас. Тактикани билмайди. У шунчаки аҳмоқ. У фаолиятимдаги энг катта ёлғончи. Унинг пайтида Фигу, Йерро ва Рауль клубда каттароқ обрўга эга бўлишган.

Бу Перес томонидан хақиқатдан айтилган гапларнинг бир қисми. У бу фикрларни анча аввал ким биландир шахсий мулоқотда билдирган. Йиллар ўтиб оммага тарқалди. Флорентино бунда журналист Хосе Антонио Абелланни айбламоқда. Унинг фикрича, Абеллан ёзувларни эълон қилмаслик учун 10 миллион евро талаб қилган. Перес журналистни судга бермоқчи.

Албатта, шахсий мулоқотни оммага чиқариш яхши эмас. Бу алоҳида мавзу. Мен эса бу воқеада бир нарсани англаяпман. «Реал Мадрид» ўз афсоналарига эътибор қилмаганнинг ортида Переснинг шахсий адовати, ўзидан юқорилаётганни қабул қилолмаслик, тан олмаслик ва ҳурматсизлик ётибти. Унинг асл феъли очилди. Бу инсон у бошқараётган клуб учун оламшумул ғалабалар олиб келган буюк шахсларни камситиш, ўзидан паст кўриш, хизматларини ерга уриш билан шуғулланган. Касильяс, Рауль, Рамосдек фидойи лидерлар бекорга «Реал»дан хафа бўлиб кетишмаган. Ҳаммасининг ортида Флорентино каби эгоист ва адекватликдан йироқ раҳбар турибти. Ўша ёзувлардаги фикрлар анча эски. Масалан Дель Боске ўшандан сўнг терма жамоада Жаҳон ва Европа чемпионлигини қўлга киритди.

Переснинг ўз қўл остида ишлаган катта номларни обрўсизлантириш сиёсати бугунга келиб ҳақиқий юзи намоён этилишига сабаб бўлди. У ҳақоратлаганларни эса бутун дунёда миллионлаб мухлислар эъзозлайди ва ҳурмат қилади.

Даврон Файзиев.