Бугун Токио олимпиадасининг очилиш маросими бўлиб ўтади. Аввалроқ Ўзбекистон миллий олимпия қўмитаси делегациямизнинг байроқдорлик вазифасини боксчи Бобо-Усмон Батуров ва гимнастикачи Оксана Чусовитинага топширганди.
Аммо сўнгги паллада байроқдорлар ўзгартирилди. Энди бу масъулиятни вазифани боксчи Баҳодир Жалолов ва таэквондочи Нигора Турсунқулова бажарадиган бўлишди.
Миллий олимпия қўмитаси бош котиби Ойбек Қосимовнинг "Ўзбекистон 24" каналига берган интервьюсида ўзгаришнинг сабаби сифатида спортчиларнинг мусобақада иштирок этиш графиги ва спортчиларнинг фикри инобатга олинганини айтиб ўтган.
Эслатиб ўтамиз, Баҳодир Жалолов Рио-2016 олимпиадаси очилиш маросимида ҳам Ўзбекистон байроғини кўтариб чиққанди.
Токио-2020 олимпия ўйинлари очилиш маросими Тошкент вақти билан 16:00да бошланади.
