Бугун Токио-2020 Олимпия ўйинларининг илк куни. Унда терма жамоамизнинг 11 нафар вакили иштирок этади. Қуйида уларнинг чиқиши ҳақидаги маълумотларни ҳавола қиламиз:
ХХХИИ ёзги Олимпия ўйинларида ҳамюртларимиз иштирокини биринчи бўлиб мерган қизимиз Мухтасар Тоҳирова бошлаб беради. Наманганлик спортчимиз 10 метрдан милтиқдан отиш бўйича саралаш дастурида қатнашади. Мазкур мусобақа Тошкент вақти билан 04:30 да бошланади.
Шундан сўнг қиличбозларимиз баҳсларга киришади. Дастлаб 05:30 да саблячимиз Шерзод Мамутов руминиялик Юлиан Теодоциу билан ҳисоб-китоб қилса, 07:25 да шпагачимиз Малика Ҳакимова хитойлик Йивен Сунга қарши жанг олиб боради.
Соат 07:00 да велоспортчимиз Муроджон Холмуродов велоспортнинг шоссе йўналишида 234 км масофада ўтказиладиган гуруҳ пойгасидаги стартини бошлайди.
Токио каналларида академик эшкак эшувчиларимиз Шаҳбоз Холмирзаев ва Собир Сафаралиев соат 06:50 дан эътиборан саралаш баҳсларига киришадилар. Ҳамюртларимиз биринчи гуруҳда 4-йўлакда ҳаракат қилишади.
Шунингдек, соат 07:00 да теннисчимиз Денис Истоминнинг ҳиндистонлик Сумит Нагалга қарши кортга чиқади.
Шундан сўнг эътиборимизни бокс баҳсларига қаратамиз. Соат 07:30 да аёллар ўртасида -69 кг вазн тоифасида иштирок этадиган ҳамюртимиз Шаҳноза Юнусова полшалик Каролина Косевскага қарши рингга кўтарилади. Тахминан соат 10 да эса яна бир боксчимиз Санжар Турсунов (-91 кг) иштироки кутиб турибди. Унда ҳамюртимиз жазоирлик Абдулхафид Бенчаблага қарши тўқнаш келади.
Расулжон Абдураҳимов соат 15:30 дан бошланадиган спорт гимнастикасининг кўпкураш йўналиши, саралаш босқичида иштирок этади.
Шубҳасиз, ушбу кун доирасида кўпчиликнинг эътибори дзюдо баҳсларига қаратилади. Унда Шарофиддин Лутфиллаев -60 кг вазн тоифасида баҳс олиб олиб боради. Полвонимиз мусобақани Украина ва Гватемала вакиллари ўртасидаги баҳс ғолибига қарши бошлайди. Дзюдо баҳслари соат 07:00 дан бошланади. Ҳамюртимиз биринчи даврадан эркин ўтгани учун унинг иштироки тахминан 30-40 дақиқалардан кейин бошланади.
Ўзбекистон Миллий Олимпия қўмитаси бўлажак баҳсларда барча ҳамюртларимизга омад ва зафарлар тилаб қолади.
