Токио-2020 олимпиадасининг таэквондо мусобақасида Улуғбек Рашитов ҳақиқий сенсация соҳибига айланди. У нимчорак финалда кореялик юлдузни мусобақадан чиқариб юборган бўлса, ҳамюртимиз финалда рейтингнинг 2-поғонасини эгаллаб турган Брэдли Синденни драматик кечган баҳсда мағлуб этди.

Британиялик таэквондочи финал жанги ҳақидаги фикрлари билан ўртоқлашди.

"Бу олтин медаль меники бўлиши керак. Аммо рақибим яхши жангчи экан. У кун давомида яхши савиядаги спортчиларни мусобақадан чиқариб юборди.

Мен финалда бир нечта хатолар қилдим. Баъзи нарсаларда эса омадим келмади. Аммо бу таэквондо. Бир нечта хатолар қилганим учун рақибимнинг камбэк қилишига имкон бердим.

Рашитовни яхши эслаб қоламан. У ўзини яхши бажарди. Мени эса Париждаги олимпиадада яна кўрасиз.

Мен Токиога олтин медални қўлга киритиш учун келгандим. Шу боис, кумуш медални байрам қилмайман. Менинг мураббийим ҳамиша бир гапни такрорлайди: "Кумуш — бу энг биринчи омадсизлик". Мен олтин медални қўлга кирита олмадим. Мен янада кучлироқ бўлиб қайтаман", — деди Синден.