Мамлакатимизда COVID-19 билан боғлиқ эпидемиологик вазият жиддий назоратда эканидан яхши хабардорсиз. Шундан келиб чиқиб, ЎзПФЛ учрашувларда иштирок этадиган футболчилар, ҳакамлар, инспектор ва комиссар саломатлиги масаласида қайғурмоқда.
Шунингдек, пандемия ҳолатида давлат тест имтиҳонлари абитуриентлар саломатлиги юзасидан очиқ майдонларда, жумладан, айрим футбол стадионларида ва унинг атрофида ўтиши режалаштирган. Буларнинг барчаси табиийки, футбол учрашувларини ташкил этиш масалаларига ўз таъсирини ўтказади.
Шундан келиб чиқиб, ЎзПФЛ U-18 чемпионати, аёллар Биринчи лигаси ҳамда қизлар ўртасида U-16 чемпионати каби мусобақаларни август ойининг иккинчи ярмига қадар қолдиришга қарор қилди. Умид қиламизки, унга қадар мамлакатимизда вазият анча яхшиланади ҳамда футбол учрашувларини ташкил этиш футбол клублари учун нисбатан енгилроқ бўлади.
Coca-Cola Суперлига, Про лига, аёллар чемпионати ва мазкур лига клублари ўртасида ўтказиладиган Ўзбекистон кубоги мусобақалари давом эттирилади. Эслатиб ўтамиз, мамлакат Соғлиқни сақлаш вазирлиги томонидан шу йил 5 июль санасидаги эълон қилинган Республика махсус комиссиясининг спорт турлари бўйича мусобақаларни мухлисларсиз ўтказиш бўйича қарори асосида Ўзбекистон Профессионал футбол лигаси томонидан ўтказиладиган барча футбол мусобақалари мухлисларсиз ўтказилади.
ЎзПФЛ футбол жамоатчилиги мавжуд вазиятни тўғри тушуниши ва тўғри талқин қилишига умид билдиради. Ҳар қандай янгилик биз томонимиздан ўз вақтида расман эълон қилинади.
