Испаниянинг Cadena Ser нашри хабарига кўра, яримҳимоячи Мартин Эдегорнинг «Арсенал»га ўтиши шу ёзда амалга ошиши мумкин.
22 ёшли норвегиялик футболчи янги мураббий Карло Анчелотти бу позицияда Искога имконият бериш ниятида эканлиги учун унга Мадридда ўйин амалиёти берилмаслигидан қўрқмоқда. У захирада ўтиришни хоҳламайди.
Эслатиб ўтамиз, «Реал» яримҳимоячиси ўтган мавсумнинг иккинчи ярмини «Арсенал»да ижара асосида ўтказди. Лондонда Эдегор АПЛнинг 14 ўйинида 1 та гол урди ва 2 та голли пасни амалга оширди.
