«Манчестер Сити» бош мураббийи Роберто Манчини жамоа ҳимоячиси Мика Ричардсга катта ишонч билдирмоқда. Бу ҳақда «Goal.com» интернет-нашри хабар бермоқда.

Италиялик мутахассиснинг фикрича, Ричардс келажакда Англия терма жамоасининг асосий таркиб ўйинчисига айлана олади. Манчинининг айтишича, 23 ёшли футболчи сўнгги бир йил давомида катта ўсишга эришган, аммо ҳали ўзининг бутун салоҳиятини намоён этгани йўқ.

«Ричардсда жаҳон даражасидаги ҳимоячи бўлиш учун керакли барча сифатлар бор. Сўнгги бир йил давомида у сезиларли ўсишга эришди, аммо унинг ҳали ҳам очилмаган қирралари бор», деди италиялик мутахассис.

«Тўғри, айни вақтда Англия терма жамоасида рақобат жуда ҳам кучли. Катта эҳтимолки, Глен Жонсон ва Кайл Уокер айнан ҳозир терма жамоа учун Ричардсдан кўра кераклироқ бўлса керак», деди Манчини.

«Мен Ричардсда салоҳият борлигини кўриб турибман. Аммо бундан фойдаланиш учун тинимсиз ишлаш керак», дея қўшимча қилди «Манчестер Сити» бош мураббийи Роберто Манчини.