Ўзбекистон олимпия терма жамоаси 16 февраль куни Уммон олимпиячиларига қарши ўртоқлик учрашуви ўтказиши расман тасдиқланди. Бу ҳақда ЎФФ расмий сайти хабар бермоқда.

Ўзбекистон олимпия терма жамоаси 10 февраль куни ўқув-машғулот йиғинларини ўтказиш учун Тошкентдан БААга жўнаб кетган эди. Олимпия терма жамоаси Дубайдаги йиғиннинг иккинчи кунидаёқ ўртоқлик учрашувида майдонга тушади. 11 февраль, шанба куни Вадим Абрамов шогирдлари Филиппин терма жамоасига қарши тўп суришади.

Уммон футбол ассоциациясидан келган расмий хатга кўра, Уммон ва Ўзбекистон олимпия терма жамоалари ўртасидаги ўртоқлик учрашуви 16 февраль куни Маскат шаҳрида бўлиб ўтади. Ўзбекистон олимпиячилари ўйиндан кейин яна икки кун давомида Уммон пойтахтида бўлишади ва 18 февраль куни Қатарга йўл олишади. 21 февраль куни бу мамлакат пойтахти — Доҳа шаҳрида Ироқ олимпия терма жамоасига қарши Лондон-2012 саралаш гуруҳ босқичи 5-тур учрашуви ўтказилади.

Таъкидлаш жоиз, Уммон олимпия терма жамоаси ҳам Лондон-2012 Олимпиадаси йўлланмаси учун кураш олиб бормоқда. Терма жамоа «А» саралаш гуруҳида, 4 учрашувдан сўнг 7 очко тўплагани ҳолда, иккинчи ўринда бормоқда ва гуруҳ пешқадами Жанубий Корея олимпия терма жамоасидан атиги бир очкога ортда қолмоқда. Уммонликлар саралашнинг 5-тури доирасидаги учрашувни айнан корейсларга қарши ўтказишашади. Учрашув 22 февраль куни Маскат шаҳрида бўлиб ўтади.

Маълумот ўрнида, Ўзбекистон олимпия терма жамоаси йиғинига жалб этилган “Насаф”нинг 21 ёшли дарвозабони Элдорбек Суюнов 10 февраль куни “Насаф”нинг Туркиядаги йиғинидан тўғри Дубайга йўл олган. БААдаги йиғинга 22 нафар футболчи жалб этилган.