АГМК бош мураббийи Миржалол Қосимов Суперлиганинг 13-тури доирасида Жиззахда бўлиб ўтган "Сўғдиёна"га қарши ўйин (0:0) борасида ўз фикрини билдириб ўтди.

«Суперлигадаги танаффусдан кейинги илк учрашувни ўтказдик. Ўйин ритмидан чиқиб кетилгани кўриниб турди. Бугун иккита бир-бирига муносиб жамоалар ўйнашди. Сўнгги йилларда "Сўғдиёна" билан жуда кўп дуранг ўйнаяпмиз. Ҳисоб очилмаган бўлса ҳам иккала томон ҳам ҳужумкор ва шиддатли ўйнади. Бугунги баҳсда дуранг икки жамоани ҳам қониқтирди деб ўйлайман. Чунки дурангга мос ўйин бўлди.

Ёзги трансфер ойнаси вақтида фақат Мартин Боакени таркибга қўшиб олдик. Сабаби футбол ўйинчоқ эмас, футболчиларнинг майдондаги ўзаро тил топишиб кетиши муҳим ва бунинг учун маълум вақт талаб этилади. Айтишадику, янги мураббий бир жамоага келгач камида 3 йил вақт керак деб. Таркибда катта ўзгаришлар фойдали ҳам бўлиши мумкин ёки аксинча тескари таъсир этиши ҳам мумкин.

Ҳакамликка эътирозим йўқ. Ҳакам хуштагини қанча кам чалса шунча яхши. Бугун шундай бўлди, жамоалар футбол ўйнашди ва майдонда қизиқарли баҳс кечди», — деди Қосимов.