AGMK bosh murabbiyi Mirjalol Qosimov Superliganing 13-turi doirasida Jizzaxda bo‘lib o‘tgan "So‘g‘diyona"ga qarshi o‘yin (0:0) borasida o‘z fikrini bildirib o‘tdi.

«Superligadagi tanaffusdan keyingi ilk uchrashuvni o‘tkazdik. O‘yin ritmidan chiqib ketilgani ko‘rinib turdi. Bugun ikkita bir-biriga munosib jamoalar o‘ynashdi. So‘nggi yillarda "So‘g‘diyona" bilan juda ko‘p durang o‘ynayapmiz. Hisob ochilmagan bo‘lsa ham ikkala tomon ham hujumkor va shiddatli o‘ynadi. Bugungi bahsda durang ikki jamoani ham qoniqtirdi deb o‘ylayman. Chunki durangga mos o‘yin bo‘ldi.

Yozgi transfer oynasi vaqtida faqat Martin Boakeni tarkibga qo‘shib oldik. Sababi futbol o‘yinchoq emas, futbolchilarning maydondagi o‘zaro til topishib ketishi muhim va buning uchun ma’lum vaqt talab etiladi. Aytishadiku, yangi murabbiy bir jamoaga kelgach kamida 3 yil vaqt kerak deb. Tarkibda katta o‘zgarishlar foydali ham bo‘lishi mumkin yoki aksincha teskari ta’sir etishi ham mumkin.

Hakamlikka e’tirozim yo‘q. Hakam xushtagini qancha kam chalsa shuncha yaxshi. Bugun shunday bo‘ldi, jamoalar futbol o‘ynashdi va maydonda qiziqarli bahs kechdi», — dedi Qosimov.