Токио Олимпиадасининг бадиий гимнастика баҳсларида иштирок этиши кутилган Сабина Ташкенбаеванинг коронавирусга чалингани туфайли делегациямиз таркибида ўзгариш рўй берганди.
Ушбу воқеадан сўнг Сабинанинг ўзи фикр билдирди. «Токиода Олимпия ўйинлари давом этмоқда. Бу мусобақаларда Ўзбекистон гимнастика терма жамоаси сафида мен ҳам иштирок этишим керак эди.
Аммо коронавирус мени ҳам четлаб ўтмади ва кетиш олдидан топширган тест таҳлилим ижобий чиқди. Шу сабабли ҳам мен Токиода бўлиб ўтаётган Олимпия ўйинларида иштирок эта олмайман.
Мени ўрнимга Олимпиадада Екатерина Фетисова иштирок этади, унга бўлажак мусобақада омад тилайман. Биз мураббийим билан Олимпиадада иштирок этиш учун боримизни берган эдик ва қийинчилик билан йўлланма олгандим.
Афсуски, унда қатнаша олмайдиган бўлдим. Ҳозир мен учун жуда ҳам қийин давр. Миллий Олимпия қўмитаси, федерация мутасаддилари, мураббийларим ва мени қўллаб турган бошқа барчага миннатдорчилик билдириб қоламан», – дейди Сабина Ташкенбаева.
