Токио олимпиадаси тобора ўз якунига яқинлашмоқда. 6 август, жума куни бир неча нафар спортчиларимиз баҳсларда иштирок этишди. Бугун Ўзбекистон делегацияси ҳисобига битта бронза ёзилди. Атлетларимизнинг бугунги натижалари билан таништириб ўтамиз.

Каноэ: аёллар, 500 метр, иккилик: Дилноза Раҳматова ва Нилуфар Зокирова
Қизларимиз саралаш босқичида 4-ўринни эгаллашган бўлса, чорак финалда финишга 2-поғонада келишди ва ярим финал йўлланмасини қўлга киритишди. Ярим финал ва финал баҳслари эртага, 7 август куни бўлиб ўтади.

Бадиий гимнастика: яккалик, кўпкураш. Екатерина Фетисова
Сабина Ташкенбаева ўрнига Япония олимпиадасида қатнашган ҳамюртимиз турли йўналишларда қуйидаги балл ва ўринларни эгаллади (26 спортчи орасида).

Тўп билан машқ — 19.400 (25-ўрин)
Халқа билан машқ — 19.800 (25-ўрин)
Лента билан машқ — 18.350 (21-ўрин)
Булава билан машқ — 17.950 (21-ўрин)
Якуний балл: 75.500 (24-ўрин)

Эркин кураш: эркаклар, 74 кг.
Бекзод Абдураҳмонов бронза медали учун дастлабки жангда Гвинея-Биссау вакили Аугусто Мидана устидан осон ғалаба қозонди. Бронза медали учун жангда эса ҳамюртимиз қозоғистонлик Данияр Кайсановни биринчи бўлимнинг ўзидаёқ таслим этди (13:2). Натижада Ўзбекистон делегацияси ҳисобига иккинчи бронза медали қўшилди.

Эркин кураш: эркаклар, 97 кг.
Рио-2016 совриндори Магомед Ибрагимов илк босқичдаёқ туркиялик Сулейман Караденизга ютқазиб қўйди (3:3). Турк курашчиси ярим финалда ютқазиб, финалга чиқа олмагани учун ҳамюртимиз бронза медали учун курашиш имкониятини қўлга кирита олмади.

Замонавий бешкураш: аёллар.
Алисэ Фахрутдинованинг 5та йўналиш бўйича натижалари билан таништириб ўтамиз:

Қиличбозлик: 196 балл
Сузиш: эркин усулда, 200 метр: 278 балл
Қиличбозлик: бонус босқичи: 0 балл
От йўрттириш: 226 балл
Югуриш ва ўқ отиш: 465 балл
Жами: 1165 балл (30-ўрин)