Coca Cola Суперлига 14-туридан ўрин олган “Сўғдиёна” – “Навбаҳор” (1:0) учрашувидан кейин жиззахликлар бош мураббийи Улуғбек Бақоев учрашув ҳақидаги фикрларини билдирди.

— “Навбаҳор”нинг ўйини 180 даражага ўзгарибди, рақиб анча ишончли ўйин кўрсатди. Кескин курашларга бой ўйин бўлишини кутгандик, шу боис, йигитларни ғалаба билан табриклайман. “Навбаҳор”га эса кейинги ўйинларда омад ёр бўлишини тилайман, — деди Улуғбек Бақоев.

— Кўрдикки, “Сўғдиёна” голдан кейин асосан ҳимояда ўйнади. Бунга “Навбаҳор”нинг босими сабаб бўлдими ёки бу тактик чорами?
— Бу нарса асосан футболчилар психологияси билан боғлиқ деб ўйлайман. Тўп ўтказиб юборишдан ёки бошқа нарсадан чўчишлари мумкин. Бизнинг кўрсатмаларимизда эса тезкор прессинг уюштириб, олдинга интилиш белгиланганди. Шунчаки, “Навбаҳор” голдан кейин анча ишончли ўйин кўрсата бошлади, бир-иккита қулай вазиятга ҳам эга бўлди, лекин улардан фойдалана олмади. Бу футбол, унда ҳар хил ҳолатлар учраб туради.

— “Навбаҳор” бугун кучли ўйин кўрсатди. Рақибдан шундай ўйин кутганмидингиз?
— Таркибда ва мураббийлар штабида рўй берган ўзгаришлардан хабаримиз бор, янги келганларнинг қандай салоҳиятга эга эканлигини биламиз. Натижада, юқорида айтганимдек, жамоа анча ишончли ўйин кўрсатишни бошлади. Ўйлашимча, кейинги ўйинларда “Навбаҳор” кўплаб жамоаларнинг “қонини ичади”.

“Навбаҳор” ПФК матбуот хизмати.