Леверкузеннинг “Байер” клуби футболчиси Михаэль Баллак 2004 йилда «Барселона» вакили бўлиш имкониятини қўлдан бой берганини афсус ва надоматлар билан тилга олиб ўтди.

Немис футболининг энг ёрқин юлдузларидан бири Баллак ўшанда уни Каталонияга кетишига рухсат бермаган “Бавария” клубини оғир шаклда танқид қилди. 

Чемпионлар лигасида “Барселона” билан кечадиган ўйин олдидан «Mundo Deportivo газетасига интервью берган футболчи жумладан шундай деди: «2004 йилда «Бавария»да ўйнаб юрган пайтим «Барселона»дан таклиф тушди. Аммо трансферим амалга ошмади. Бу уят эди. Чунки мен каталонияликлар билан оғзаки келишган эдим. Уле Хёнеснинг розилигини ҳам олгандик, у менга оқ фотиҳа берди. Аммо ёзда бу шартномага қўл қўймаслигим учун қўлидан келган кароматни кўрсатишди. Евро-2004дан кейин Хёнес мени сотмасликларини, шу боис трансферни пайсалга солиб келганларини айтди”.

Жаҳли чиққан футболчи қуйидагиларни қўшимча қилди: «Бавария» раҳбариятининг пишиб турган трансфернинг белидан тепиши мени жуда хафа қилди. Баъзан Месси, Иньеста ва Хавилар билан бир клубда ўйнаш қандай бўларди, деб ўйлаб қоламан. Бу ҳақда ўйлашнинг ўзи мени ҳаяжонга солади».