Ўтган тунда Европа Чемпионлар лигаси нимчорак финалининг дастлабки икки учрашуви ўтказилди. Леверкузеннинг «Байер» клуби «Байарена»да йиғилган 30 мингдан зиёд мухлис кўз ўнгида Европанинг амалдаги чемпионига имкониятни бой берди.
Учрашувнинг биринчи бўлимида айтарли, таърифлашга лойиқ вазиятлар юзага келтирилмади. Фақатгина Лионель Мессининг ажойиб тўп узатишидан Алексис Санчес ҳисобни очгани эътиборга олинмаса. Ушбу голдан сўнг ҳам «Барселона» «ўз услуби»да тананаффусга чиқиб кетди – бир-бирига шошилмасдан, аниқ тўп узатиб вақтни ўлдириш воситасида.
Иккинчи бўлим эса «Барселонача футбол»дан зерикканларнинг кутганига терс ўлароқ бошланди. 52-дақиқадаёқ Чорлуканинг тўп оширишидан Кадлец ҳисобни тенглаштирди. Бу вазият ўрганиб қолганимиз – «Барселона»нинг ўзининг ҳар бир ўйинининг оний бир лаҳзаларида нўноқларча ўйнаш орқали рақибга имконият яратиб бериши орқасидан юзага келди.
Бироқ «фармацевтлар» шодлиги кўпга чўзилмади, орадан уч дақиқа ўтгач, Фабрегаснинг аниқ узатмасидан сўнг Алексис Санчес қайсидир маънода биринчи голига ўхшаш гол уриб, яна «Барселона»ни олдинга олиб чиқди.
Бу орада ҳар икки жамоа вакиллари томонидан дарвозалар устуни нишонга олинди: леверкузенликлардан Аугусто, каталонияликлардан Месси томонидан.
Лекин Лионелнинг тақдирига барибир шу куни гол уриш ёзилган экан. 88-дақиқада уч ўйинчи қуршовида қолган Мессидан тўпни қабул қилиб олган Дани Алвеш ўнгдан жарима майдонига ёриб кира туриб, дарвоза томон ўқдай учиб келаётган Мессини «кўрди» ва тўпни қизғанмай яна унга узатди. Месси эса тўпни тўхтатмасдан дарвоза томон «кесди» – 1:3.
Ушбу ғалабадан сўнг «Барселона» жавоб ўйини олдидан ким фаворит эканлиги борасидаги барча гап-сўзларга узил-кесил чек қўйди.
БАЙЕР (Германия) – БАРСЕЛОНА (Испания) 1:3 (0:1)
Голлар: Кадлец (52) – Санчес (41, 55), Месси (88).
БАЙЕР: Лено, Кадлец, Райнартц, М. Фридрих, Г. Кастро, Р. Аугусто, Рольфес (Кисслинг, 77), Чорлука (Виейра да Коста, 90), Л. Бендер, Швааб, Шюррле (Бельараби, 90).
БАРСЕЛОНА: Вальдес, Дани Алвес, Абидаль, Пуйоль, Адриано (Педро, 70), Иньеста (Алькантара, 61), Фабрегас, Маскерано, Бускетс, Санчес (Куэнка, 86), Месси.
Огоҳлантиришлар: Швааб (8), Чорлука (53), Г. Кастро (80), Алькантара (87).
Жавоб учрашуви: 8 март 00:45 да.
Нимчорак финалнинг иккинчи учрашувида мавсум «кашфиёти» - Кипрнинг АПОЭЛЬ клуби Лионнинг «Стед де Жерлан»ида «Олимпик» меҳмони бўлди. Лакасетнинг иккинчи бўлим бошларида киритган ягона голи учрашув тақдирини ҳал қилди. Бу ҳисоб эса Кипр клубида ҳали имконият борлигини билдиради. Ким билади дейсиз, балки сенсациялар ҳали олдиндадир?
ЛИОН (Франция) – АПОЭЛ (Кипр) 1:0 (0:0)
Гол: Лакасетт (58).
ЛИОН: Льорис, Ревейер, Коне, Крис, А. Сиссоко, Гоналон, Чельстрем, Эдерсон (Гуркюфф, 71), Бастос, Лакасетт (Бриан, 59), Лисандро.
АПОЭЛ: Хиотис, Боавентура, Кака, Паулу Жорже, Барбоса Мораиш, Элдер Соуза (Марсиньо, 72), Хараламбидис (Мандука, 82), Пинту, Пурсайтидис, Тричковски, Аилтон (Э. Солари, 67).
Огоҳлантиришлар: Пинту (52), Марсиньо (89).
Жавоб учрашуви: 8 март 00:45 да.
