Суперлигада иккинчи давра старт олгач, стадионга мухлислар ташрифига чеклов қўйилди. Ушбу воқеага таниқли мутахассис Диёр Имомхўжаев муносабат билдирди.
«Кўриняптики, мухлислар стадионга қайтишни жуда истаяпти. Улар Англияни кўряпти, Испанияни кўряпти, Германия футболига қараяпти ва ўзимизнинг ҳувиллаган майдонларга. Биз албатта давлат тест имтиҳонларини футболдан устун қўйдик, абитуриентлар учун шароит бўлсин учун футбол учрашувларини бошқа стадионларга кўчирдик. Карантин меъёрлари сабаб маълум муддат мухлисларнинг қадамини яна стадионлардан уздик, улар сабр қилишди.
Аммо биламизки, секин-аста талаблар юмшатиляпти. Кечагина президентнинг спорт ҳақида куюниб айтган фикрларидан келиб чиқиб, Ўзбекистон Coca-cola кубоги 1/8 финалига қадар мухлисларнинг стадионларга қайтиши учун расман рухсат этишса, нур устига нур бўларди. Насаф ҳам ОФК кубогидаги халқаро ўйинини ўзимизнинг қора кўзлар қаршисида ўтказарди. Бизда финал учун ажойиб имконият бор, 30 йилликка Насаф катта совға ҳозирлаши мумкин.
Очиқ ҳаво, яхши ҳаво, яхши кайфият, карантин қоидаларига риоя қилиш – ҳаммаси бўлади. Фақатгина бизга мухлислар керак», дейди мутахассис.