"Ювентус" ҳужумчиси Криштиану Роналду келажаги ва "Реал"га қайтиши мумкинлиги ҳақидаги миш-мишларга муносабат билдирди.

"Камроқ гапириш ва кўпроқ ҳаракат қилиш менинг фаолиятим бошидан буён шиорим бўлиб келган. Бироқ, яқинда айтилган ва ёзилган ҳамма нарсани ҳисобга олган ҳолда, ўз позициямни билдиришим керак.

Шахс ва ўйинчи сифатида менга нисбатан ҳурматсизлик қилаётганлар, келажагим ҳақидаги оммавий ахборот воситаларидаги миш-мишлар менга ва бунга алоқадор бўлган барча клубларга, уларнинг футболчилари ва ходимларига нисбатан ҳурматсизлик бўлмоқда.

Менинг "Реал"даги ҳикоям рақамларда, кубок ва унвонларда, "Бернабеу" стадионидаги музейда ва клубнинг ҳар бир мухлисининг онгида ёзилган.

Мен эришган ютуқларимдан ташқари, тўққиз йил мобайнида мухлисларга меҳр ва ҳурмат билан муносабатда бўлганман, уларни мен ҳозиргача асрайман. Биламан, "Реал Мадрид"нинг ҳақиқий мухлислари ҳам мени юрагида сақлайдилар.

Мени турли лигалардаги бир қанча клублар билан боғлайдиган янгиликлар тез-тез чиқмоқда ва ҳеч ким ҳақиқатни аниқлаштиришни истамаяпти.
Мен жим тура олмайман, одамлар менинг исмим билан ўйнашишига бошқа чидай олмайман.
Мен ўз карьерам ва ишимга эътиборимни ўз клубимга қаратаман ва мен дуч келадиган барча қийинчиликларга тайёрман.
Қолганларнинг ҳаммаси? Қолганларнинг ҳаммаси шунчаки гап ”, - деб ёзди Роналду
Инстаграмда.