Премьер-лига клублари Чемпионшипга ёш иқтидорли футболчиларни ижарага бериши одатий тусга кириб қолган. Трево Чалоба ва шунга ўхшаш бир қанча ёш юлдузлар мамлакатнинг иккинчи дивизионида ўз номларини сезиларли тарзда қолдиришгани бунга ёрқин мисол. Stadion.uz қуйида шу хусусда фикр юритади.
1992 йилдан буён худди АПЛ сингари Чемпионшип ҳам Англия футбол лигалари ичида асосий мусобақа сифатида тилга олиб келинади. Хабарингиз бор, Чемпионшипдан кейинги турнирлар Лига 1 ва Лига 2 номлари остида ўтказилиши белгиланган. Маркетинг ва молиявий масалалар борасида юқори дивизион қолган лигаларга нисбатан албатта бир бош устун. Бироқ, сўнгги йилларда Премьер-лига клубларининг Чемпионшипга ижара асосида футболчилар етказиб бериши тобора кўп урфга кириб бормоқда.
Бу эса албатта ушбу турнирнинг ривожига улкан ҳисса қўшиши табиий. Қуйида бу ҳақда қисқача сўз юритамиз. Жорий мавсум бошида барчанинг диққат-марказини бир ерда ушлаб турган «Челси»нинг 22 ёшли марказий ҳимоячиси Трево Чалоба ўтган мавсумни Франция чемпионатида, «Лориент» жамоасида ўтказди. Аммо бундан олдин у Чемпионшип клублари - «Ипсвич» ва «Хаддерсфилд»да ижара асосида тажриба тўплаганди. Шу билан бирга, 2018/19 йилги мавсумда Чалоба «тракторчи болалар»га лигада қолишларига ёрдам бера олмади. Бир йилдан сўнг эса жамоаси сафида Чемпионшипда аранг жон сақлаб қолишнинг уддасидан чиқди.
Гарчи гранд клубда ўйнаш тажрибаси йўқлигига қарамай, Чалоба юқоридаги жамоалар сафида улкан ўйин тажрибасига эга бўлди. Натижада юқори техник ва жисмоний хусусиятларни ўзида етарлича жамлаган Чалоба Тиаго Силванинг асосий таркибда йўқлигидан фойдаланиб, «Челси» сафида иккита учрашув ўтказишга улгурди, олий дивизион тажрибаси эса энди ўйиндан ўйинга шаклланиб бораверади.
Премьер-лигадаги дебют ўйинида Чалоба «Кристал Пелас» дарвозасига гол уришга муваффақ бўлди (3:0), шундан сўнг Томас Тухель ҳимоячини «Ливерпул»га қарши муҳим жангга ҳам ташлашдан қўрқмади (1:1). Трево охирги икки мавсумда жами 73 та ўйинда майдонга тушди, улардан 64 таси бошланғич таркибга тўғри келади. Мутахассислар Чалобани Мейсон Маунтнинг изидан борадиган умидли юлдуз сифатида тахмин қилишмоқда.
Воқеадан узоқлашмаймиз, «Челси» сафида ижарага бериб юборилган йигитлардан шунингдек, Мейсон Маунтни ҳам кўрсатиш мумкин. 2018/19 йилги мавсумда ёш яримҳимоячи «Дерби» сафида Френк Лемпард билан бирга ишлади. «Челси»га таклиф олганида эса уни раҳбарият мамнуният билан кутиб олди. Бунга албатта жамоага Френкининг бош мураббий бўлгани ҳам қайсидир маънода сабаб бўлгани рост. Нима бўлган тақдирда ҳам Маунт ҳозирда «Челси»нинг асосий таркибдаги ажралмас ўйинчисига айланган. Дарҳақиқат, унинг Англия терма жамоасидаги тутган позициясини ҳам алоҳида таъкидлаш керак.
«Челси» одатда Чемпионшип клубларига талантли ёшларни юбориб, тажриба тўплаб олишларига қулай имконият яратиб беради. Ушбу тезисни тасдиқловчи яна бир мисол сифатида Кот-дъИвуарлик инглиз футболчиси Марк Гехини келтириш мумкин. 2020 йил январь ойида туғилган футболчи, «кўклар» академияси тарбияланувчиси ҳисобланади. Ўтган мавсумда Марк «Суонси»га ижарага берилди, у ерда ҳимоячи тезда ўз ўрнини топиб кетди ва 18 ой ичида 57 та ўйин ўтказди, шундан 56 тасини Гехи асосий таркибда бошлаган.
Бу Гехига бошқа клубларнинг скаутлари эътиборини жалб қилишга ёрдам берди ва шу ёзда «Челси» Маркни «Кристал Пелас»га сотишга рози бўлди. «Суонси»га ижарага берилишидан олдин кўпчилик эшитмаган 21 ёшли футболчининг трансферидан «кўклар» 21 миллион фунт ишлаб топди. Бу ҳатто «Челси»нинг умумий стандартлари бўйича ҳисоблаганда ҳам яхшигина даромад бўлган. Гехининг ўзи ҳамон «глейзерлар» лагерида сўзсиз асосий таркиб ўйинчиси ҳисобланади. Унга лондонликларнинг янги мураббийи Патрик Виейра чексиз ишонч билдирган.
Аммо «Челси» Чемпионшипга ўз иқтидорини бериб юборган Премьер-лигадаги ягона клуб эмас. Мисол учун, «Тоттенхэм» яримҳимоячи Оливер Скипп билан шунга ўхшаш ишни муваффақиятли амалга оширди. У Премьер-лигадаги дебютини 2018 йил 5 декабрда 18 ёшида Маурисио Почеттино қўл остида ўтказган. Лекин унинг бу ерда умуман ишлари ўхшамади ва кейинчалик «шпорлар»нинг биринчи жамоаси учун вақти-вақти билан майдонга тушадиган вазиятда қолиб кетди. Бироқ «Норвич»га ижарага берилганидан сўнг бу тенденция мутлақо ўзгариб кетди. Ўтган мавсум Скипп Чемпионшипда 45 та учрашувда майдонга тушган бўлса, уларнинг 44 таси асосий таркибга тўғри келади. Кейинчалик «Тоттенхэм»га қайтган Оливер, «шпорлар»нинг янги бош мураббийи Нуну Эшпириту Сантунинг ишончини қозона олди. У лондонликлар сафида дебют баҳсда иштирок этди.
Бу каби йигитлар қуйи лигаларда етарлича ўйин амалиётига эга бўлгач, ўз асосий гранд клубларида "пишиб" етила бошлайди.
