Ватанимиз спорти тарихида афсонавий Лина Черязованинг ўрни беқиёс. Мустақил Ўзбекистоннинг илк Олимпиада чемпиони 2019 йил оғир хасталикдан сўнг ҳаётдан кўз юмган эди. Ўзбекистон Республикаси Президентининг фахрий спортчиларимизга юксак ҳурмат ва эҳтиром кўрсатиш бўйича берган топшириғига биноан Черязова дафн этилган қабристонда ободонлаштириш ишлари олиб борилди.
Лина Черязова 2019 йил 23 март куни вафот этди. Фристайл бўйича Лиллехаммер-1994 қишки Олимпиадаси чемпиони, жаҳон чемпиони дафн қилинган Россия Федерацияси, Новосибирск шаҳри, «Клешчинский» қабристонида унга ёдгорлик ўрнатилди. Мазкур тадбирда МОҚ, Туризм ва спорт вазирлиги, Ўзбекистон Республикасининг Новосибирск шаҳридаги Бош консуллиги мутасаддилари иштирок этишди. Ёдгорликка Черязованинг туғилган куни ва ўлими қайд этилган санадан ташқари “Фристайл бўйича Ўзбекистоннинг Олимпиада ва жаҳон чемпиони” деган таъриф ҳам битилган.
Фристайлнинг акробатика йўналишида юртимиз шаънини ҳимоя қилган ушбу спортчимиз шарафига қишки Олимпия ўйинларида илк бор Ўзбекистон давлати мадҳияси янграган. Шунингдек, у 1993 йил жаҳон чемпионлигини қўлга киритган. Кўрсатган хизматлари учун “Меҳнат шуҳрати” ордени, Ўзбекистон Республикасида хизмат кўрсатган спортчи” ва “Ўзбекистон ифтихори” фахрий унвонлари билан тақдирланган.
Ўзбекистон Миллий Олимпия қўмитаси Лина Анатолевна Черязованинг хотирасини абадийлаштириш йўлида ёрдам берган барча ташкилотларга ўз миннатдорчилигини билдириб қолади.
