Ироқ ва ўзбекистон олимпия терма жамоалари ўртасидаги Лондон олимпиадаси III саралаш босқичи 5-тури учрашуви олдидан Доҳадаги «Wyndham Grand» меҳмонхонасида ҳар иккала жамоа бош мураббийлари ўртасида матбуот анжумани ўтказилди.

Камсонли журналистларнинг саволларига дастлаб Ўзбекистон олимпия терма жамоаси бош мураббийи Вадим Абрамов жавоб берди. Вадим Карленовичнинг фикрича, Ироқ Олимпиада йўлланмасини қўлдан чиқарганига қарамасдан, кечиши кутилаётган ўйин ўзбекистонлик футболчилар учун асло «енгил сайр» бўлмайди.

«Бизни гуруҳда яна атиги икки ўйин кутмоқда. Шу сабаблабли уларнинг ҳар бирига диққатни жамлаш лозим бўлади. Ироқ гуруҳдан чиқиш учун барча имкониятларини йўқотди, лекин бу рақибга ҳурматсизлик билан қараш кераклигини билдирмайди. Ҳаммамиз Ироқ терма жамоаси қандай қилиб очколаридан айрилганини яхши биламиз, лекин ўйин жиҳатда улар жуда яхши ва кучли жамоа ҳисобланади».

«Баъзан барча нарсани қўлдай бой берган жамоалар ўз олдига ждиддий мақсад қўйган жамоаларга нисбатан яхшироқ ўйин намойиш этишади».

«Ироқдан 3 очко тортиб олиниб, Бирлашган Араб Амирликларига берилганига тўхталадиган бўлсам, айтишим мумкинки бу ишлар ФИФАнинг ихтиёрида. Лекин бизнинг эътирозимизга сабаб бўлаётган ягона нарса БАА ҳисобига ёзилган 3 та гол бўлмоқда. Ушбу саралаш босқичида ҳали ҳеч бир жамоа 3 та гол уролгани йўқ, лекин Амирликларга шунча миқдордаги ўта муҳим голлар совға қилиб юборилди», — деди Вадим Абрамов.