Одил Аҳмедов “Анжи”ни танлаганида номдорроқ клубни танласа яхши бўларди, деганди баъзилар. Буни қарангки, олдинлари 1-лигадан боши чиқмайдиган Маҳачқалъа клуби бир йил ичида манаман деган клубларнинг тиззасини қалтирадатиган клубга айлана олди.
Жумладан, “Галатасарой”нинг тиззалари дағ-дағ титрамоқда айни дам. Чунки ушбу клуб қайси футболчи билан музокора олиб бормасин, "Ташла бешни" деган гап қолганда, кимдир томдан тараша тушгандек пайдо бўлиб, ўша футболчини илиб кетмоқда. Мисол учун швейцариялик Жердан Шакирини охир-оқибат “Бавария” ўзиники қилиб олганди. Ваҳоланки Истанбул клуби бу футболчи келади деб, қизил гиламга буюртма ҳам бериб қўйганди. Клуб бу омадсизликдан сўнг “Арсенал” ярим ҳимоячиси Томаш Росицкийни кўз остига олиб қўйди, аммо уни олдингилардан-да жиддий рақиб пайқаб қолди ва кўз олайтира бошлади. Бу Россиянинг “Манчестер Сити”си – “Анжи”.
“Fanatik” нашрининг ёзишича, ушбу клуб ҳам чехиялик футболчини ўз сафида кўрмоқчи. Фотиҳ Терим ушбу мавсум шартномаси тугайдиган футболчини ёзда ўз жамоасида кўришни жуда хоҳлаётган эди, аммо футболчи Гус Хиддинк шогирдига айланиб кетади-ёв.
