Испаниянинг Андалусиясидан бўлган «Севилья» клуби Чемпионлар лигаси доирасида бугун оқшомида «РБ Зальцбург»га қарши саф тортади. Ушбу жамоалар кейинги турларда «G» гуруҳида «Лилл» ҳамда «Вольфсбург» билан рақобатлашиши керак.
«Севилья» ушбу баҳсга ички лигада «Эльче» билан 1:1 ҳисобидаги дуранг ўйин билан етиб келди. Улар ўтган ҳафта якунида «Барселона»га қарши майдонга тушиши керак эди, аммо ушбу тўқнашув номаълум муддатга ортга сурилди. Ҳозирда «Севилья» учта турда 7 очко билан Ла лига жадвалида 6-ўринни банд этган.
Бу даврда «Зальцбург» Австрия Бундеслигасида «Тироль» клубини 3:1 ҳисобида мағлуб этди. Жамоа таркибидаги голларга Адаму, Ноа Окафор ҳамда Бенжамин Сеско муаллифлик қилишган. Клуб 7 та ўйинда 7 та ғалаба билан турнир жадвалида пешқадамлик қилмоқда.
«Севилья» ҳамда «Зальцбург» шу чоққача икки маротаба тўқнаш келишган бўлиб, ҳар икки баҳс испанияликлар фойдасига ҳал бўлган. Охириги баҳсда 2:0 ҳисоби қайд этилган бўлиб, андалусияликлар таркибида Фредерик Кануте дубл қайд этган эди.
Янги мавсумдаги жамоалар статистикаси:
«Севилья» Ғ-Ғ-Д. (барча турнирларда)
«Зальцбург» Ғ-Ғ-Ғ-Ғ-Ғ. (барча турнирларда)
«Севилья» таркибида Людвиг Аугустинсон, Папу Гомез, Маркос Акуня ҳамда Гонзало Монтиел халқаро танаффусдан қайтган ва Юлиан Лопатегига ёрдам беришга шай ҳолда турибди. Клуб асосий футболчиларидан фақат биттасида, марказий ярим ҳимоя вакили Оливьер Торресда жароҳат мавжуд ва ўйинда қатнаша олмайди.
«Зальцбург» таркибида асосий жамоада йўқотишлар кўпроқ. Секу Кейта, Златко Юнузович ва Алберто Валлчида жароҳат мавжуд. Улар Маттиас Яйссле бошчилигидаги жамоада бугун майдонга туша олмайди.
Ушбу ўйин катта эҳтимол билан Испан гранти устунлигида ўтади. Улар ЕЧЛнинг илк баҳсида ютишга одатланган. Ҳозирги кунда ҳам «Севилья» таркибида ўйинни ўзгартириб юбора оладиган, баҳс динамикасига таъсир этувчи ва албатта, яхши ижрочилар мавжуд. Кўплаб мутахассислар, жумладан, «BT Sports» телеканали ушбу баҳс 2:1 ҳисобида «Севилья» фойдасига ҳал бўлишини тахмин қилишган.
«Севилья»нинг тахминий таркиби:
Дарвозада: Яссин Бону;
Ҳимояда: Маркос Акуня, Диего Карлос, Жюл Кунде, Хесус Навас;
Таянчда: Фернандо, Хуан Жордан;
Ярим ҳимояда: Папу Гомез, Сусо ва Эрик Ламела;
Ҳужумда: Юссуф Эн-Несирий.
«РБ Зальцбург»нинг тахминий таркиби:
Дарвозада: Филипп Кон;
Ҳимояда: Ниссен Кристенсен, Умар Соле, Максимилан Вобер, Андреас Улмер;
Ярим ҳимояда: Муҳаммад Камара, Николас Капалдо, Николас Шейвалд;
Ҳужумкор ярим ҳимояда: Бренден Аронсон;
Ҳужумда: Чуквубе Адаму ва Карим Адейемий.
Эслатиб ўтамиз, юқоридаги баҳс Тошкент вақти билан 21:45да старт олиши белгиланган. Ўйинни МТРК таркибидаги «Маҳалла» телеканали орқали томоша қилиш мумкин.
Жалолиддин ИСМАТОВ тайёрлади.
