«Шўртан» ёшлар жамоаси аъзоси Ҳикмат Асадов Қашқадарё ҳокими кубоги финалидан сўнг ўз фикрлари билан ўртоқлашаркан, қўлга киритилган муваффақият учун жамоадошларига миннатдорчилик билдирди. Бу ҳақда «Шўртан» расмий сайти хабар бермоқда.

«Насаф-2» ва «Шўртан-2» жамоалари ўртасида бўлиб ўтган Ҳоким кубоги финали асосий вақтида ҳисоб очилмади. Пенальтилар сериясида эса омад «Шўртан» футболчиларига кулиб боқди. Ғузорликлар футболчиси мусобақа ташкилотчилари томонидан энг яхши футболчи ва тўпурар деб топилди.

«Аввало, мусобақада ғолиб чиққанимиз билан жамоадошларимни табриклайман. Умуман, мусобоқа давомида биз юқори нотада ўйин кўрсатиб, ғалабага хақли ўйин намойиш этдик, деб ўйлайман. Туғри финалда омад туфайли пенальтилар сериясида ғалаба қозондик», деди футболчи.

«Турнирни ташкил қилган раҳбарларга, умуман, барчага ўз миннатдорчилигимни билдираман. Албатта, мусобақа тўпурари бўлиш жуда ёқимли. Бунинг учун жамоадошларимга миннатдорчилигимни билдираман», дея қўшимча қилди «Шўртан-2» футболчиси Ҳикмат Асадов.