Қозоғистоннинг Чимкент шаҳрида ўқ отиш спорти бўйича Осиё чемпионатининг ортда қолган навбатдаги куни ҳам терма жамоамиз учун сермаҳсул якунланди. Унда вакилларимиз 7 та медаль қўлга киритишди.

Олимпия ўйинларида иштирок этган вакилларимиз Вадим Скороваров (Рио-2016) ва Мухтасар Тоҳирова (Токио-2020) пневматик милтиқдан отиш бўйича микст дастурида кумуш медалга сазовор бўлишди.

Ушбу йўналишда ёшлар тоифасида кечган дастурда Александра Давидова ҳамда Ойбек Асилов тандемининг ғалабаси шарафига ватанимиз мадҳияси янгради. Шунингдек, қуйидаги йўналишларда ҳам вакилларимиз совриндорлар қаторидан жой олишди:

Кумуш:
Пневматик тўппончадан отиш жамоавий: Муҳаммад Камолов, Умидбек Камолбеков, Вениамин Никитин.
Ҳаракатдаги нишон: Аёллар ўртасида жамоавий, ўсмирлар ва ёшлар.

Бронза:
Ҳаракатдаги нишон: Эркаклар ўртасида жамоавий.

Шу тариқа ушбу мусобақада қўлга киритган медалларимиз 3 та олтин, 5 та кумуш ва 3 та бронзани ташкил этмоқда. Бугун яна бир қатор йўналишларда вакилларимиз медаллар учун кураш олиб боришади.