Дариус Нирутов номли 7 ёшли футболчи “Челси” академиясида бепул ўқиш учун қабул қилинди. Бу болакайнинг отаси Азиз Нуритов Ўзбекистонда туғилган. Шунингдек, Қозоғистонда ҳам уларнинг қариндошлари бор.

Бундан 3 йил олдин Азиз Нуритов “Челси”нинг машғулот курслари ҳақида эълон ўқиб қолади ва 4 ёшли фарзандини ушбу мактабга олиб боради. Машғулот жараёнида у ҳафтанинг энг яхши футболчиси деб топилди ва совға олди.

— Ўшандан бери Дариус бирорта ҳам машғулотларни ўтказиб юбораётгани йўқ. У ўзини яхши томонлама кўрсата оляпти. У ҳар бир ўйиндан кейин совға билан қайтади, — дейди ёш футболчининг отаси.

Дариус Нуритовнинг кумирлари — Фернандо Торрес ва Дидье Дрогба. Ёш футболчининг ўзиҳам 9 рақам остида ўйнайди. Chelsea Regent’s Park жамоаси бош мураббийи Дариусни “Барселона” футболчиси Лионел Мессига ўхшатади ва уни янги Месси деб атайди.

Азиз Нуритов ўғлининг “Челси” клубининг асосий академиясига қабул қилинишини ва кейинчалик “Челси” ўйинчисига айланишини жуда истайди.

— Академия қабул қилиниш учун пул тўлаш керак. Аммо академия унинг иқтидорига аҳамият берди ва уни ўз сафига чорлади. Агар у асосий академияга кира олса, шубҳасиз, “Челси”нинг ҳақиқий футболчисига айланади, дейди Нуритов.