Бугун Чемпионлар Лигаси гуруҳ босқичи 1-тур учрашувлари доирасидаги «Шериф» – «Шахтёр» жамоалари ўртасидаги баҳс бўлиб ўтди. Қизиқарли кечган беллашувда молдоваликлар 2:0 ҳисобида ғалаба қзонишди. Мазкур беллашувнинг биз учун аҳамиятли жиҳати, «Шериф» сафида тўп тепадиган Ўзбекистон терма жамоаси аъзоси Жасурбек Яхшибоев ЕЧЛдаги дебют учрашувини ўтказди. Шу тариқа, Жасур мазкур мусобақада ўйнаган ўзбекистонлик 7-футболчига айланди. Европанинг клуб даражасидаги энг нуфузли мусобақасида шу кунгача Олег Пашинин («Локомотив М»), Владимир Маминов («Локомотив М»), Максим Шатцких («Динамо К»), Сефер Алибаев («Таврия»), Николай Турчиненко («Таврия») ва Жафар Ирисметов («Спартак») ўйнашган эди ва бугун ушбу футболчиларимиз сони яна биттага ошди.

Эслатиб ўтамиз, «Шериф» – «Шахтёр» жамоалари ўртасидаги учрашувда мезбонлар 2:0 ҳисобида ғалаба қозонишди. Голлар эса Тароре ва Янсане томонидан киритилди. Молдова клуби ЕЧЛнинг кейинги турида «Реал» клубига қарши майдонга тушади. Мадридда кечадиган беллашув 28 сентябрь кунига белгиланган.