Суперлиганинг 21-туридан ўрин олган «Андижон» — «Сўғдиёна» (0:0) учрашувидан кейин меҳмонлар бош мураббийи Улуғбек Бақоев ўз фикрларини билдирди.

"Чемпионат якунига етиб бормоқда, агар мусобақа жадвалига қарасак «Андижон» учун ҳам, биз учун ҳам очколар керак эди. Иккала томон ҳам тартибли ўйнашга интилди. Албатта, дуранг — биз учун ёмон натижа. Йигитларга ўйин учун раҳмат айтаман, «Андижон» жамоасига кейинги баҳсларда омад тилайман", — дейди Улуғбек Бақоев.

— «Сўғдиёна» айни пайтда иккинчи ўринда бормоқда. Аммо шунга қарамай клубни танқид қилаётганлар ҳам бор. Уларга қандай муносабатдасиз?
— Ҳозир мусобақа жадвалининг юқорисида ҳам, пастида ҳам пойга жуда жиддий кечмоқда. Ўйлашимча, охирги тургача жамоалар кўп очко йўқотишади, аммо бир нарсани айта оламан: «Сўғдиёна» охиригача курашади. Худо хоҳласа, «Сўғдиёна» медаллардан бирини қўлга киритади.

— Бугун жамоа етакчилари Норхонов ва Ҳасанов майдонда йўқолиб қолишди. Иккинчи таймда улар алмаштирилди...
— Бу «Андижон» жамоасининг хизмати деб ўйлайман. Аммо шунга қарамай Норхоновда 1-2та вазият бўлди, ўша вазиятларда «Андижон» посбони яхши ўйнади. Шу боис бунда қўрқинчли ҳеч нима йўқ.

— Агар «Сўғдиёна» иккинчи ўринни сақлаб қолса, ОЧЛда иштирок этиши мумкин. Жамоа бунга тайёрми?
— 100 фоиз тайёр! Барча томонлама тайёрмиз. Аммо дастлаб ўша йўлланмани қўлга киритишимиз керак, кейин бу ҳақда гаплашсак тўғри бўлади.