Ўзбекистон Футбол Федерациясининг расмий твиттери хабарларига кўра, Ўзбекистон терма жамоаси 26 февраль куни Тошкент вақти билан 10:30 да Япониянинг Нагоя шаҳрига учиб келди.
Нагоя аэропортида Ўзбекистон терма жамоаси аъзоларини Япония оммавий ахборот воситалари ходимлари қарши олишди.
Вадим Абрамовнинг қисқача интервьюсидан маълум бўлдики, 29 февраль кунги сўнгги тур учрашувида терма жамоамиз олдига қўйилган асосий асосий вазифа — Альберто Дзаккерони бошқарувидаги Япония терма жамоасига мағлуб бўлмасдан, гуруҳдаги пешқадамликни сақлаб қолишдан иборат.
Терма жамоамиз Нагоядаги биринчи кунда енгил тикланиш машғулотлари билан шуғулланди. Кечга бориб эса, назарий машғулот ўтилди.
Миллий терма жамоамиз делегацияси Нагоя аэропортидан 1 соатлик масофадаги тарихий Нагоя қалъаси ҳудудида жойлашган «Уэстин» меҳмонхонасига жойлашди.
Таъкидлаб ўтиш жоизки, Ўзбекистон терма жамоасини қўллаб-қувватлаш учун фан-клуб аъзолари ҳам Японияда бўлиб туришибди. Улар пойтахт Токиодаги «Метрополитен» меҳмонхонасида истиқомат қилмоқда. Фан-клуб 29 февраль — ўйин ўтадиган куни Нагоядаги «Тойота» стадионига келади.
