26 февраль куни Тошкент вақти билан 10:30 да Япониянинг Нагоя шаҳрига етиб келган Ўзбекистон миллий терма жамоаси делегацияси « Westin Nagoya Castle» меҳмонхонасига жойлашди. Бу ҳақда ЎФФ расмий сайти хабар тарқатмоқда.

Бу меҳмонхона Нагоя қалъаси яқинида жойлашгани эътиборга молик. 29 февраль куни Япония миллий терма жамоасига қарши бўлиб ўтадиган ўйинга Тойота автомобилларини ишлаб чиқарувчи шаҳардаги «Тойота» стадиони мезбонлик қиладиган. Вакилларимиз бўлиб истиқомат қилаётган меҳмонхона ва стадион ўртасидаги масофа 1 соатни ташкил қилади.

Дастлабки кун Вадим Абрамов шогирдлари тикланиш машғулотларини ўтказиб, кечки пайт назарий билимларни бойитишди. Бугундан эътиборан эса футболчилар Нагояда илк марта жисмоний машқларни бажаришди. Тошкент вақти билан 17:00 да эса назарий машғулот ўтказилади.

БААнинг «Аш-Шабаб» клуби аъзоси Азиз Ҳайдаровнинг шамоллаб қолгани ҳақида хабар бериб ўтгандик. Олинган хабарга кўра футболчининг соғлиғи яхшиланиб бормоқда ва у Японияга қарши ўйинда майдонга тушиши мумкин. Эслатиб ўтамиз, Япония миллий терма жамоасига қарши ўйин 29 февраль куни Тошкент вақти билан 15:32 да бошланади.