"Локомотив" ярим ҳимоячиси Жасур Жалолиддинов собиқ жамоасига қарши ўйин олдидан қисқа фикрларини билдириб ўтди.

- Биринчи даврани "Андижон" таркибида ўтказдингиз. Умуман олганда футболчининг собиқ жамоасига қарши ўйнаши қанчалик қийин?

- Қийин тарафи йўқ. Айни дамда очко барчага сув ва ҳаводек зарур. Шу сабабли "Андижон" сўнгги турларда очколар учун борини бериб ўйнамоқда. Биз эса сўнгги икки ўйинда иродали ғалабага эришдик. Икки жамоанинг оҳирги ўйинларига назар ташлайдиган бўлсак, бугун қийин ўйин бўлиши шубхасиз.

- "Машъал"га урилган голингизни яна такрорлаш ниятингиз борми?

- "Жўжани кузда санайдилар" деганларидек, барча нарсанинг сарҳисобини берадиган вақт яқинлашмоқда. Айни дамда ким гол уришининг аҳамияти йўқ. Муҳими ғалаба қозониб, уч очко олсак бўлгани. Ўз ўйинларимизда ғалаба қозонаверсак, турнир жадвалида юқорига кўтариламиз. Олдиндаги 5 ўйинда қийин рақибларга қарши ўйнаймиз. Ушбу ўйинларда максимал равишда очко олишга интиламиз", - деди ярим ҳимоячи.