"МЮ" бош мураббийи Оле Гуннар Сульшернинг истеъфоси алоҳида қарор сифатида балким энг тўғрисидир, аммо бундай қарор ортидан иккинчи масалани ҳам эргаштиради - унинг ўрнига ким?

Афсуски, клуб раҳбарияти учун номзодлар у қадар кўп эмас. Антонио Конте ва Зидан варианти тилга олиняпти. Зидан бундай таклифни рад этиши ҳақида хабарлар пайдо бўлди, Конте эса, баъзи хабарларга қараганда, "МЮ" раҳбариятини тўлиқ қониқтирадиган вариант эмас. Унинг клубда иккинчи Моуриньо бўлишидан хавотирлар бор. Биринчидан, Контенинг ўйин услуби у қадар жозибадор эмас, иккинчидан, характери оғир. "МЮ" босслари клуб бошида ҳужумкор ўйин кўрсатадиган ва узоқ муддатга жамоа муҳитини ижобий ушлаб турадиган мураббийни исташмоқда.

Бундай вазиятда мен Сульшерни йил охиригача қолдиришни танлаган бўлардим. Ёзда катта эҳтимол билан жуда кўп, хусусан "МЮ" талабларига мос келадиган мураббийларни қўлга киритиш имкони пайдо бўлади. Масалан, "Аякс" бош мураббийи Тен Хааг, Почеттино ёзга бориб истеъфо бериши мумкин, Грэм Поттер бор масалан - "Брайтон" устози. Бу мураббийлар айнан ҳозир "МЮ"га кела олмайдилар: "Аякс" ЕЧЛ да, "Брайтон" АПЛ да зўр бошлади. Ёзда эса, мураббийлар танлови "МЮ" раҳбарлари учун анча кенг бўлади.

Ёзгача ишлашга рози бўладиган, аммо вазиятни ўнглаш тажрибаси бўлган Хиддинк, Бенитес ёки Раньери каби номзодлар айни муддао бўларди, лекин улар бўш эмас. Конте эса, бундай таклифга рози бўлмайди, у билан камида икки йилга шартнома имзолаш керак.

Шунчаки, Сульшерни бўшатиш учунгина хуш кўрилмаган номзодни (Конте) танлаш самарали ечим эмас, назаримда.

Қаҳрамон Асланов.