«Тоттенхэм» спорт директори Фабио Паратичи клуб раҳбариятининг Нуну Эспириту Сантуни бош мураббийлик лавозимидан бўшатиш ҳақидаги қарорига изоҳ берди. «Тоттенхэм» бугун, 1 ноябрь куни португалиялик мутахассисни ишдан бўшатганини эълон қилди.

“Нуну ва унинг мураббийлар штаби қандай муваффақиятга эришмоқчи бўлганини биламан. Ва бу қарорни қабул қилганимиздан афсусдаман. Нуну ҳақиқий жентлмен. Мен унга раҳмат айтмоқчиман", - дея Паратичининг сўзларини келтиради лондонликлар матбуот хизмати.

Сантунинг «Тоттенхэм»даги охирги учрашуви АПЛнинг 10-туридан ўрин олган «Манчестер Юнайтед» билан ўйин бўлди. Учрашув 3:0 ҳисобида «қизил иблислар» фойдасига ҳал бўлди.

Аввалроқ, «Тоттенхэм» бош мураббийлигига номзод сифатида Сантунинг ҳамюртлари — «Порту» устози Серхио Консейсау ва бунгача «Шахтёр» ва «Рома»ни бошқарган Пауло Фонсека кўрилаётгани ҳақида хабар берилганди. Шунингдек, давогарлар орасида италиялик Антонио Конте ҳам бор.