Мана ҳозиргина,"Ал-Жазийра" клуби делегациясини ўз бағрига олган яъни БААдан Қаршига қараб учган самолёт шаҳримиз аэропортига келиб қўнди. «Voha.Uz» мухбирлари мухлисларга ваъда қилишганидек ёритиш учун аэропортда ҳозиру-нозир бўлишди.

Эртага 5 март куни соат 12:00да ҳар иккала жамоа бош мураббийлари ҳамда жамоа етакчилари билан ўйин олди матбуот анжумани бўлиб ўтади. Даставвал ОАВ ходимларининг саволларига жавоб қайтариш учун "Ал-Жазийра" бош мураббийи Франк Веркаутерен ҳамда жамоа етакчиси қатнашишади. Тадбирнинг иккинчи қисмида эса жамоамиз устози Рўзиқул Бердиев журналистлар саволларига жавоб беришади.

Шунингдек, учрашув олдидан ташкил этиладиган матбуот анжуманида клуб матбуот хизмати томонидан аккредитациядан ўтказилган ОАВ ходимлари 2012 йилги Чемпионлар лигаси баҳслари учун ўз карточкаларини олиб кетишлари мумкин.

Барча журналистларни матбуот анжуманига таклиф этамиз.