"ПСЖ" футболчиси Неймар кеча "Бордо"га қарши учрашувда дубл қайд этиб, ўз фаолиятида янги маррага эришди. 29 ёшли ҳужумчи бу голлари билан ўз фаолиятида 400 марта рақиб дарвозасига йўл топган футболчига айланди.
Бразилиялик баҳсдаги биринчи голини ватандоши, хонанда, Лотин Гремми совриндори Марилия Мендока хотирасига бағишлаганди. Мендока бундан бир неча кун олдин самолётда ҳалокатга учраган.
"ПСЖ" меҳмонда 3:2 ҳисобида ғалаба қозониш орқали, ўз очколари сонини 34тага етказиб олди ва турнир жадвалида яққол етакчиликни давом эттирадиган бўлди. Эслатиб ўтамиз, иккинчи поғонадаги "Ланс"да 24 очко мавжуд.
