Айни пайтда "Интер" шарафини ҳимоя қилаётган Ҳоқон Чолҳонўғли Италия чемпионатининг 12-тури доирасида бўлиб ўтган баҳсда "Милан" мухлислари билан кичик можарога борди.
"Сан-Сиро"да бўлиб ўтган учрашувнинг дастлабки дақиқаларида "россонери" ярим ҳимоячиси Франк Кесси ўз жарима майдони ичида Чолҳонўғлига нисбатан қоидабузарлик ишлатгани учун пенальти белгиланди.
Жарима зарбасини туркиялик футболчининг ўзи амалга ошириб, жамоасини олдинга олиб чиқди. "Милан" мухлислари эса, "россонери" билан шартнома имзолашни истамасдан принципиал рақиби сафига ўтиб кетган Ҳоқонга нисбатан ўша лаҳзада ҳуштакбозлик қилишди. Чолҳонўғли уларга тезда жавоб қайтарди: пенальтидан гол ургач, мезбон жамоа ишқибозлари томон икки қўлини қулоқларига қўйганча, "эшитмаяпман" ишорасини қилди.
Эслатиб ўтамиз, Чолҳонўғли "Милан"даги 4 йиллик фаолиятидан сўнг ёзда эркин агент сифатида "Интер" билан шартнома имзолади.