Суперлига ҳамда Про лигада иштирок этаётган клубларга ажратилаётган маблағларнинг мақсадли сарфланишини мониторинг қилиш мақсадида Вазирлар Маҳкамасининг 2021 йил 30 апрелдаги “Футбол клублари фаолиятининг самарадорлигини ошириш чора-тадбирлари тўғрисида”ги 261-сонли қарорига мувофиқ профессионал футбол клубларининг йиллик харажатлар сметаси ЎФА билан келишилган ҳолда тасдиқланиши белгиланди.

Барча футбол клублари 2022 йилги харажатлар сметаси лойиҳасини ҳозирданоқ ишлаб чиқмоқда ва ЎФАга келишиш учун тақдим этмоқда. Клубларнинг аввало инфратузилма ва академияни ривожлантириш масаласига пул йўналтиришини таъминлаш учун ЎФА ва ЎзПФЛ вакилларидан ташкил этилган махсус комиссия клубнинг йиллик харажатлар сметасида биринчи навбатда стадион ва майдон парваришига, академия ҳамда ўқув-машғулот қароргоҳини ташкил қилиниши, аёллар ва футзал жамоалари, шунингдек турли ёш тоифасидаги жамоаларнинг мусобақалардаги иштироки харажатлари акс этгани бўйича ўз таклиф ва тавсияларини бермоқда.

Бундан кўзланган асосий мақсад – аксарият клубларда узоқ йиллардан буён ечим топмай келаётган инфратузилма бўйича камчиликларни босқичма-босқич бартараф этишдан иборат.