Сўнгги пайтларда юртимизда бокс ҳакамлари фаолиятини янада ривожлантиришга эҳтиёж туғилмоқда. Шу мақсадда Ўзбекистон бокс федерацияси раҳбарияти юртимиздаги бокс ҳакамлари малакасини ошириш, ушбу йўналишда янгиликларни татбиқ этиш борасида амалий ишларни бошлаб юборган.
Бугун шу мақсадда бокс ҳакамлари иштирокида онлайн йиғилиш ташкил этилди.
Йўлга қўйилган лойиҳа ҳақида AIBA мусобақалар ўтказиш қўмитаси, ASBC мусобақалар ўтказиш комиссияси аъзоси Шоҳид Тиллабоев томонидан тушунтириб берилди.
Ушбу йўлга қўйилаётган тизимдан мақсад, бокс ҳакамларида малакани ошириш, ҳакамликда адолат, шаффофлик масалаларини кучайтиришдан иборат.
Ҳакамлик масаласидаги муаммолар ўз навбатида селекция ишларига ҳам таъсир қилаётгани, бунинг оқибатида иқтидорлар кўзга кўринмай қолиб кетаётганлиги таъкидланди.
Режага кўра, 4-7 декабрь кунлари Буюк Британия ва Украинадан AIBAнинг тажрибали инструкторлари ўзбекистонлик ҳакамлар учун семинар ўтади ва янги тизимнинг мазмун-моҳияти билан яқиндан таништиради. Семинарда қатнашган тингловчилар AIBAнинг тажрибали инструкторларига имтиҳон топширишади. Бу орқали ҳакамларимиз малакасини ошириш ва халқаро ареналарда ўзбекистонлик ҳакамларнинг сонини кўпайтириш мақсад қилинган.
Ўзбекистон бокс федерацияси ҳакамликда ўзини синаб кўрмоқчи бўлган ҳамюртларимиз учун танлов эълон қилганди. Айни пайтда ҳакамликка талабгорларни рўйхатга олиш ишлари давом этмоқда. Мазкур танлов ҳам юртимизда ҳакамлик корпусини ривожлантиришнинг муҳим бўлган қисмларидан бири ҳисобланади.
